【佔領者的故事 • 之五】

【佔領者的故事 • 之五】

落區義工心聲（一）：馬拉松式角力戰 - Wendy

雖然講係文宣組，其實更似係上門吹水隊。

今晚既第一單係大戶人家。係旺角街市做生意，有自己樓，生活應該算係過得唔錯，所以當問起佔領對佢地有冇影響， 佢地豪氣豁達咁講有影響但無所謂。

原本諗住作短暫宣傳，點知就陷入長達一小時既攻防戰，兩個男人接力發言，其他人不時路過表態...
我地話現時樓價太高買唔起樓，佢地就援引九八年金融風暴話樓價太低無人敢買樓。

我地話政府政策惠及唔到基層，佢地就話以前老一輩夠係無政府幫，“獅子山精神“咁養起成頭家，語重心長咁勸我地年青人有手有腳自己捱唔好乜都靠政府。

我地話民主化有利社會，佢地就連埃塞俄比亞都搬出黎以引證民主都唔係好嘢。

最好笑既係我地呼籲佢地夜晚落樓下佔領區睇下，佢地就叫我地六點去街市睇下。

最後我唔知有冇成功令呢戶人支持行動，始終大家既關注點好唔同。我地年青人係佢地眼中似是唔憂食既理想主義者，而我始終都理解唔到佢地“錢就係一切“既觀念。我同情有小商戶因為佔領而受苦，但最大既苦其實係因為政府只偏幫一小部分的既得利益者而忽視基層所致。追本溯源，怪得一班逼上梁山既佔領者咩？

編注：【落區義工心聲專欄】此專欄為每天落區義工撰寫的文章，呈現義工的思考和想法。此專欄文章只代表作者本人的觀點。