職業司機撐佔中 怕民主路難行

職業司機撐佔中　怕民主路難行

 

【記者馬志剛、朱雋穎報道】這陣子，親建制勢力頻頻發功，將和平佔中扭曲成暴力行為、會癱瘓港九新界交通，小巴、的士司機也「被動員」出來反對。卻有兩位職業司機，不怕爭普選會阻塞交通，只怕香港民主路越來越難行。的士司機潘伯，年屆70也拋下軚盤，參與和平抗爭，「拉就預咗，我未驚過」；紅van司機歐陽大哥（化名），向來與政治保持距離，但見警察暴力清場，暗地義載佔中壯士，「自己做唔到，都想有人去做」。

■的士司機潘德斌稱，「拉就預咗，我未驚過」。

被捕的士大佬：搵少啲有乜所謂

「人生七十古來稀，都過咗70歲，仲有乜好怕？」頂更的士司機潘德斌，7.1遊行後留下陪同學生佔領遮打道，是511名被捕者之一。坐上駕駛席馳騁港九數十年，見證香港民主路越見狹隘，聲言若無真普選，佔領中環勢在必行，就算癱瘓交通，他也支持，「聖誕新年夠封路啦，搵少啲有乜所謂？」最重要是香港要有真普選，「拉就預咗，我未驚過」。
潘伯是最後一批被抬走的被捕者，「身為香港人，應該要出聲，啲後生連前途都唔顧，我仲怕乜？」他說自己原則性很強，堅持是其是、非其非，年輕時曾參加保釣運動，八九六四也捐出1,000元，「當時1,000蚊，好多錢㗎喇。好多的士佬都參加義載，做到咪做囉」。「古來稀」的潘伯走上街頭對抗極權，唯一顧慮是不能回鄉春秋二祭，「如果下次返去有麻煩，唔返囉，對個天講『老竇老母，對唔住，唔返喇』」。

「圈幾個人出嚟邊係普選」

回憶自己首次被捕，他仍說得振振有詞，「除咗揸車入『薄落』（路障），咁大個人連差人查身份證都未試過」，平日在老人中心做義工，9時吃早餐，被捕後卻一直空肚，曾兩次胃出血的他感不適，加上一直不獲准如廁，他在旅遊巴難以再忍，「我話忍唔到就失禁，差人終於肯畀我去廁所，但兩個人夾住我，又唔俾閂門」，捱過大半天獲釋，他如沒事般回家，太太以為他開夜更，至今仍未知老伴曾被捕。
年事已高熱血不減，潘伯最不滿是梁振英的強人統治手法。潘伯說，近年香港政治檢控頻繁，梁班子用人唯親，新移民不斷湧港殖民換血，「香港變得好快，香港人最唔開心就係呢幾年。嗰時窮，冇人怨，最緊要係有工開；𠵱家有工開都死，有汗出冇糧出」。
他說低下層受壓迫多，社會上有不公平事願出聲爭取，「普選對低下層最公平，可以用選票趕佢（漠視民意者）落台」，普選一人一票不夠嗎？「共產黨圈幾個人出嚟叫你投票，呢啲邊係普選？」佔中爭取真普選，癱瘓交通是必然，潘伯身為職業司機，卻願身體力行參與其中，「開少幾日工有乜問題。阻住搵食？咁你咪避囉！得一條路咩？呢啲人係眼光短淺！」

■司機歐陽先生曾駕紅van義載被捕的佔中壯士。

紅van義載壯士：佢哋係為社會

「你哋嘅錢唔收，香港靠你哋！」那夜8時，7.2預演佔中的被捕人士陳又德登上開往旺角的紅van，歷44小時抗爭，拖着疲憊的身軀回家，下車時，司機大佬說了這麼一句話。同行數人，位位20元的車資，也就免了。紅van義載令陳又德大受感動，記下車牌，上網撰文表揚司機：「佢冇參與公民抗命，但係佢用咗佢嘅方式去支持。」文章被瘋傳。

「佢哋唔做就冇人做」

憑車牌到站頭找人不易，一條路線說少也有20多架紅van在跑。記者好不容易找到了那輛撐被捕者的紅van，車上司機大佬又笑說自己只是替更。幸同線行家彼此熟悉，不一會就聯絡上當事人。
「好小事啫，見啲後生仔咁辛苦，做咁多嘢都係想香港好。」紅van司機歐陽先生（化名）如是說。歐陽非本姓，司機大佬行事低調，不願上鏡，寧以化名透過電話受訪。那幾個穿黑衫年輕人，一登車就給他「非一般乘客」的感覺。在這之前，他一直透過新聞報道留意遮打道抗爭現場，看到警察暴力清場，深感不忍，「得嗰百幾人，使唔使咁呢？人哋都話明8點走，點解唔等多幾個鐘？係咪要做到咁絕呢？」
歐陽大哥認為年輕人為香港、為自由，不惜拋頭露面，不顧「整花個底」，是偉大，「啱定唔啱我唔知，但至少佢哋有勇氣，唔係為自己，係為社會，咁我都想畀啲energy支持吓」。他自言不太認同佔中行動，但細想下又說：「自己做唔到，都想有人去做，我贊成佢哋爭取嘅嘢係應該㗎」。他說自己只是星斗市民，生活中不時都感受由強權而來的壓力，能做的卻不多，「弱者就係咁，我哋做唔到強者。佔中雖然唔啱，但佢哋唔做就冇人做，個政府就會鍾意點就點喎」。
早前，號稱「新小巴大王」的凌志強附和反佔中，發動千輛小巴貼海報表態，歐陽先生不苟同、拒配合。他認同的士小巴權益大聯盟主席黎銘洪的政治中立論，無論是全民投票，與反佔中簽名，他統統不參與。他大抵不會參加佔中，但也不反對，「真係好矛盾，影響一定有，但會唔會令我好唔開心呢？又唔會喎，又唔會嬲佢哋喎。佢哋做得ok㗎，值得支持㗎」。